WAFATIN SAYYIDA ZAINABUL KUBRA (S.A) | 15 GA WATAN RAJAB.

Jawad Nuradeen February 06, 2023

A irin wannan rana ta 15 ga watan Rajab, Sayyida Zainab (SA) ta yi wafati, ga Taƙaitaccen Tarihin Sayyida Zainab (SA).

Sunanta: Zainab

Mahaifinta: Amirul Mumineen Ali ɗan Abu Ɗalib (AS).

Mahaifiyarta: Shugabar Matan duniya Sayyida Fatima Zahra (SA) ‘ƴar Fiyayyen halitta Muhammad Manzon Allah kuma cikamakin Annabawa (S).

Ƴan uwanta: Shugabannin Samarin Aljanna Imam Hassan da Hussain (AS).

Laƙubanta: Haura, Aƙilatu bani Hashim, Siddiƙatus Sugra, Gwarzuwar karbala, Zainabul Kubra, Ummul masa'ib.

Mijinta: Abdullahi bin Ja'afar bin Abi Ɗalib.

Ƴa‘ƴanta: Ali, Aun, Abbas, Muhammad, Ummu kulthum. Aun da Muhammad sun yi shahada tare da baffansu Imam Hussain (AS) a karbala.

Haihuwarta: An haifi Sayyida Zainab ne a ranar 5 ga watan Jimada Ula a garin Madina Shekara ta biyar bayan hijirar Manzon Allah (S) daga Makka zuwa Madina.

Wafatinta: Ta yi wafati ranar 15 ga watan Rajab shekara ta sittin da biyu bayan hijirar Manzon Allah (S) a garin Sham.

Makwancinta: An bizne ta a Sham da ke Siriya.

RAWAR DA SAYYIDA ZAINAB TA TAKA A CIKIN AL'UMMA.

Sayyida Zainab (AS) ta taka muhimmiyar rawa wajen kiyaye mata tare da cigabantar da su, a lokacin da take kufa ta na da zaure a gidanta wanda take fassarar Alƙur'ani mai girma, Sheikh Saduk ya ambata cewa Sayyida Zainab tana da keɓantaccen wakilci daga Imam Ali bn Husain (AS), Kuma mutane suna komawa gareta a halas da haram ɗin su har zuwa lokacin da Imam Zainul Abidin (AS) ya warke daga ciwon da yake fama da shi bayan waƙi'ar Karbala.

A taƙaice wanann shi ne Tarihin Sayyida Zainab (AS) wanda muka iya kawo muku a wannan rana, domin tunawa da ita.

Muna yi wa Allah da Manzonsa da iyalan gidansa Ta'aziyya, da kuma sauran A'immatu Ahlul Baiti, sannan muna yi wa Jagoranmu Sheikh Ibrahim Zakzaky (H) Ta'aziyya bisa wafatin Kakarsa Sayyida Zainab (SA) a irin wannan rana, sannan muna miƙa saƙon ta'aziyyar mu ga ɗaukacin Al'ummar Musulmin Duniya baki daya.