Wasu makasa ɗauke da makamai sun dira a ƙauyukan Gara da Gamji na gundumar Burra dake karamar hukumar Ningi ta jihar Bauchi.
Da isowar makasan sun buɗe wuta kan mai uwa da wabi, hakan ne yayi sanadiyyar hallakar rayukan mutane bakwai.
Makasan sun dira a ƙauyen ne a babura ƙirar Bajaj, da misalin ƙarfe 9 na daren ranar Talata.
Hakanan kuma su ɓalle shagunan mutane sun kwashi kayan abinci.
Rundunar ƴan sandan jihar ta bayyana sunayen waɗanda aka kashe a ƙaunyen Gamji kamar haka: Mai unguwa Ali,Umar Sabo, Ali Usman, Shu'aibu Adamu, Yunusa Adamu, Ali Aldo.
Ahmed Wakili, Jami'in hulɗa da jama'a na rundunar ƴan sandan jihar Bauchi ya tabbatar wa manema labarai faruwar lamarin.
Kwamishinan ƴan sandan jihar Auwal Muhammad ya jajantawa al'ummar da abun ya shafa kuma umarci jami'an su suyi iya ƙoƙarin su wajen kamo waɗanda suka kawo wannan hari.
0 Comments